Martes, 15 de setembro de 2026. O Concello de Narón, en liña co acordado pola Mancomunidade de Concellos da Comarca de Ferrol, fai un chamamento á veciñanza para manter un uso responsable e racional da auga ante a situación de prealerta por seca activada por Augas de Galicia. Na xuntanza mantida, os alcaldes e alcaldesas abordaron a reparación de fugas na Ponte das Pías co financiamento dos concellos e a xestión ante outras administracións, e conviñeron manter unha xuntanza técnica coa Xunta para o seguemento da prealerta. O Concello de Narón lembra que os municipios da comarca xa adoptaron en xullo unha serie de medidas de aforro, anticipándose á evolución da situación e co obxectivo de contribuír á preservación dos recursos hídricos. Entre elas, están a redución do rego de xardíns, hortas e zonas verdes con auga da rede; a prohibición de encher ou repoñer auga en piscinas particulares, desmontables ou permanentes; a limitación da limpeza de vehículos en domicilios particulares; e a redución de baldeos de rúas, patios, terrazas, fachadas, muros, garaxes ou calquera outro espazo exterior con auga potable. Tamén se pide reducir ao máximo o uso de fontes ornamentais que non conten con circuíto pechado, pechar a billa cando non sexa necesario, acurtar o tempo das duchas e empregar a lavadora e o lavalouzas sempre a carga completa. Desde o Concello de Narón tamén se interveu directamente sobre a xestión municipal para reducir o consumo. Así, cortouse a subministración nas fontes públicas, levouse a rega e os baldeos das rúas ao mínimo indispensable e intensificouse a vixilancia para detectar e reparar posibles fugas na rede. A alcaldesa, Marián Ferreiro, subliñou que "o aforro de auga é responsabilidade de todos e todas, e dende o Concello seguiremos traballando para garantir o abastecemento mentres pedimos á veciñanza que manteña estes hábitos de consumo responsable no día a día".