Martes, 29 de setembro de 2026. O Concello de Narón, a través do Servizo de Normalización Lingüística, súmase un ano máis ao Club de Debate Alingua, un proxecto de dinamización lingüística que ten como obxectivo mellorar as destrezas orais en galego da mocidade e que xa abriu o prazo de inscrición da edición 2026/2027. Os equipos interesados poden apuntarse ata o venres 20 de novembro. O club está pensado para alumnado de 3º e 4º de ESO, 1º de bacharelato e ciclos formativos, sempre que teñan como máximo 18 anos. Cada equipo estará formado por entre 4 e 10 participantes, preferentemente mixtos, e por unha persoa preparadora, que pode ser docente ou persoal de administración e servizos. A dinámica é sinxela de explicar e esixente de levar a cabo. Todos os equipos disputan dous debates, tanto nas fases clasificatorias como na final, e defenden nun deles a postura a favor e no outro a contraria sobre un mesmo tema, polo que teñen que preparar a fondo os dous puntos de vista. Un xurado de cinco persoas, entre as que hai profesorado, xornalistas, lingüistas e xuristas, valora as intervencións segundo os criterios do regulamento. Antes de competir, todos os equipos inscritos participan nunha xornada formativa de catro horas en habilidades comunicativas. O calendario previsto, que se concretará cando remate o prazo de inscrición, sitúa a formación na semana do 12 ao 15 de xaneiro, os debates clasificatorios na do 22 ao 26 de febreiro e a gran final o 24 de abril de 2027. Nas fases clasificatorias, o equipo gañador recibirá un premio de 800 euros e o segundo, un de 500. Os dous mellores equipos da final levarán unha viaxe multiaventura dunha fin de semana para un máximo de 20 persoas, que está prevista para os días 15 e 16 de maio. O tema da final decídese entre os concellos organizadores e xira arredor dunha cuestión relacionada coa lingua. Para as fases clasificatorias, en cambio, escóllese un asunto controvertido e de actualidade, e os centros inscritos poden enviar as súas propostas aos servizos de normalización lingüística. Máis alá da competición, o club procura crear espazos de convivencia nos que alumnado de distintos centros e concellos comparta actividades guiadas e use o galego fóra da aula. Na edición anterior mobilizou preto de medio milleiro de persoas, entre alumnado e docentes. Os equipos deben cubrir a ficha de inscrición, asinala e enviala ao Servizo de Normalización Lingüística do Concello de Narón no correo a.pita@naron.gal. Para máis información, pódese chamar ao 981 337 700 (ext. 1516), consultar https://naronengalego.gal/ ou seguir o Club de Debate nas súas redes: Facebook (AlinguaDebate) e Instagram (@clubdedebate_alingua).